2466 - Single_lajmi | Ministria e Puneve te Jashtme
MPJ
  • 12 May 2018
  • SHARE
  • PRINT

Fillon në Sunion, ministeriali i Grupit të Vishegradit, plus vendeve të Ballkanit perëndimor, ku ministri Pacolli po merr pjesë me ftesë të homologut të tij grek, Nikos Kotzias

 Do shkëmbejmë vizita dypalëshe, të forcojmë marrëdhëniet, veçanërisht ato ekonomike- thonë njëzëri ministri i jashtëm i Kosovës, Behgjet Pacolli, dhe ai polak, Jacek Kaputoviç, që u takuan në Sunio të Greqisë. 

“Kosova dhe Polonia janë të gatshme të forcojnë marrëdhëniet dypalëshe. Unë do vizitoj Prishtinën dhe ju jeni të mirëpritur në Varshavë”, i tha ministri i jashtëm polak, Jacek Kaputoviç, ministrit të jashtëm të Kosovës dhe numrit dy të qeverisë, Behgjet Pacolli. 

“Në rastin më të parë dua të vij në Varshavë për vendosjen e marrëdhënieve diplomatike dhe të forcojmë bashkëpunimin ekonomik. Ju jeni partnerët më të mirë për ne, sepse na kuptoni shumë mirë”, tha z. Pacolli. Ai, vlerësoi reputacionin e lartë të ndërmarrjeve polake që “ka patur rastin ta vlerësojë shumë herët”. 

Ministri Pacolli e falënderoi homologun e tij për mbështetjen e Polonisë për Kosovën në procesin e integrimit europian. 

Gjatë takimit të ngrohtë dhe miqësor u diskutua edhe për zhvillimet rajonale. I pyetur sesi e sheh përfundimin e bisedimeve Kosovë-Serbi, prej homologut polak, shefi i diplomacisë kosovare tha se “Kosova është shtet i pavarur, i gjithë pranuar dhe Serbia fqinji i saj. Dialogu përfundimtar po bazohet pikërisht mbi këto premisa, sepse ne duam të ndërtojmë të ardhmen e sigurt të fëmijëve tanë,” tha z. Pacolli. 

Ministri i jashtëm, Behgjet Pacolli, gjendet në Sunio të Greqisë me ftesë të homologut të tij grek Nikos Kotzias, ku sapo nisi punimet ministeriali i Procesit të Vishegradit (Poloni, Republika Çeke, Hungari, Sllovaki), plus vendeve të Ballkanit Perëndimor. 

Ministeriali, që po zhvillohet pak ditë para samitit të Sofies, do të fokusohet në problematikën e zgjerimit të Bashkimit Europian dhe bashkëpunimit dypalësh të vendeve pjesëmarrëse. Në të marrin pjesë shumë ministra të jashtëm dhe Kosova ka konfirmuar disa takime të nivelit të lartë.

 

Foto Galeria