2743 - Single_lajmi | Ministria e Puneve te Jashtme
MPJ
  • 22 September 2017
  • SHARE
  • PRINT

Zv. Kryeministri dhe Ministri i Jashtëm Pacolli në takimin e vendeve të Kartës së Adriatikut: Kosova duhet të bëhet anëtare e plotë

New York, 22 Shtator – 2017 – Zëvendës-Kryeministri i Parë dhe Ministri i Jashtëm i Republikës së Kosovës, z. Behgjet Pacolli, mori pjesë në takimin e Ministriave të Jashtëm të vendeve anëtare të Kartës së Adriatikut.

 

Në adresimin e tij, para homologëve të shteteve anëtare, Zëvendës-Kryeministri i Parë dhe Ministri i Jashtëm i Republikës së Kosovës, z. Behgjet Pacolli, shprehi zotimin e Qeverisë së re të Republikës së Kosovës për bashkëpunim rajonal dhe nevojën e angazhimit të përbashkët për një Ballkan Perëndimor më të sigurtë, më stabil dhe më prosperues, duke ri-theksuar se orientimi drejt integrimit në strukturat Evro-Atlantike mbetet shtylla kryesore e politikës së jashtme të Republikës së Kosovës.

“Karta e Adriatikut për shumë vite ka qenë një rrëfim suksesi i bashkëpunimit të afërt dhe strategjik në mes rajonit tonë dhe Shteteve të Bashkuara të Amerikës. Ky mekanizëm shërben si një lidhje e fortë në mes neve dhe NATO-s dhe është plaftormë e dukshme për të siguruar paqe dhe stabilitet në Ballkanin Perendimor”, ka thënë Zëvendës-Kryeministri dhe Ministri i Jashtëm Pacolli. 

“Ne nuk dëshirojmë që të jemi vetëm vëzhgues në Forume të rëndësishme si ky. Ne e meritojmë që të jemi anëtar. Anëtar, me të drejta të plota. Kjo Kartë nuk do të jetë në gjendje që të përmbush misionin e saj, përderisa Kosova nuk është anëtare dhe politika e derës së hapur e Kartës nuk është një realitet”, ka vazhduar ai. 

Në vazhdimin e prezantimit, Zëvendës-Kryeministri i Parë dhe Ministri i Jashtëm, z.Pacolli, ka thënë se anëtarësimi i Malit të Zi në NATO ishte lajmi më i mirë që rajoni i Ballkanit Perëndimor kishte pranuar për një kohë të gjatë, derisa ka bërë thirrje, që ky proces të vazhdojë edhe me Kosovën, Maqedoninë dhe vendet tjera të rajonit.

Tutje, ai ri-theksoi përkushtimin e Institucioneve të Kosovës në lidhje me dialogun me Serbinë mbi normalizimin e marrëdhënieve, si dy shtete të pavaruara dhe njëkohësisht shprehu zotimin se procesi i tranformimit të Forcës së Sigurisë së Kosovës në Forca të Armatosura të Kosovës do të bëhet në koordinim me NATO-n dhe vendet partnere.

 

Foto Galeria