Me ftesë të Zëvendëskryeministrit të Qeverisë së Republikës së Maqedonisë së Veriut, Arbën Fetai, Zëvendëskryeministrja dhe Ministrja në detyrë e Punëve të Jashtme dhe Diasporës, Donika Gërvalla, së bashku me Kryeministrin e Republikës së Kosovës, Albin Kurti, mori pjesë në ngjarjen qendrore kushtuar Ditës së Alfabetit të Gjuhës Shqipe, të mbajtur në Pallatin e Kulturës në Manastir.
Ministrja Gërvalla theksoi rëndësinë historike të Kongresit të Manastirit të vitit 1908, ku u mor vendimi unifikues për alfabetin e gjuhës shqipe. Ajo theksoi se ky vendim shënoi pikënisjen e një epoke të re për popullin shqiptar, duke i hapur rrugën shkollës shqipe, zhvillimit kulturor modern dhe projektit politik të lirisë e shtetndërtimit.
Ministrja Gërvalla u shpreh se Manastiri mbetet një prej pikave më të forta të kujtesës kolektive, duke kujtuar se pa gjuhë nuk ka vetëdije kombëtare e rezistencë politike.
“Gjuha shqipe na bashkon përtej kufijve shtetërorë, nga Kosova, Shqipëria, Maqedonia e Veriut e deri te mërgata jonë në çdo cep të botës. Ajo është themeli i identitetit tonë kombëtar, kudo që jetojmë”, u shpreh ministrja Gërvalla.
Zëvendëskryeministrja Gërvalla falënderoi Zëvendeskryeministrin Fetai, dhe nikoqirët për mikpritjen e ngrohtë dhe theksoi rëndësinë që institucionet e Maqedonisë së Veriut vazhdojnë t’i kushtojnë shënimit të 22 Nëntorit me dinjitetin dhe respektin që meriton kjo ditë e veçantë për shqiptarët kudo.
