Përmbledhje e Politikës së Jashtme

Ballina › Përmbledhje e Politikës së Jashtme

Hyrje

Marrëdhëniet dypalëshe

Marrëdhëniet shumëpalëshe

Diaspora

Vizioni i Ministrisë së Punëve të Jashtme dhe Diasporës është forcimi i subjektivitetit ndërkombëtar të Republikës së Kosovës, duke zgjeruar e thelluar marrëdhëniet dypalëshe dhe duke u bërë pjesë e organizatave multilaterale të cilat janë me interes për qytetarët e vendit dhe qëllimet strategjike të Republikës. Kjo synohet të arrihet nëpërmjet përmirësimit të shërbimit të jashtëm, strategjisë së lobimit dhe promovimit diplomatik, kulturor dhe ekonomik.

Ministria e Punëve të Jashtme dhe Diasporës angazhohet për zhvillimin e marrëdhënieve dypalëshe, nëpërmjet lidhjes së marrëveshjeve të ndryshme në kuadër të bashkëpunimit politik, të sigurisë, ekonomik, tregtar dhe kulturor. Ministria e Punëve të Jashtme dhe Diasporës angazhohet që partneriteti me vendet me interes strategjik, përveç pozicionimit të përbashkët ekonomik, të përmbajë edhe dimensionin gjeopolitik të kultivimit të marrëdhënieve dypalëshe dhe avancimin e interesave reciproke. Një vëmendje e veçantë i kushtohet vendosjes së marrëdhënieve të reja diplomatike me vendet me të cilat mungojnë ato.

Kosova ka synim anëtarësimin në NATO, BE, Këshill të Evropës, OKB dhe organizata të tjera nëpërmjet të cilave mund të realizohen interesat kombëtare të vendit. Aktualisht, Kosova është vend potencial kandidat për integrime në BE dhe ka marrëdhënie të mira me NATO. Në këtë aspekt, Kosova do të avancojë në dy drejtime, nëpërmjet zbatimit të MSA dhe marrjes së statusit të vendit kandidat për integrim në BE, si dhe anëtarësimit në programin e Partneritetit për Paqe të NATO, si hap drejtë anëtarësimit të plotë. Më 12 maj të vitit 2022, Republika e Kosova ka dërguar letrën e interesit për t’u bërë anëtare e plotë e Këshillit të Evropës, organizatë kjo e një rëndësie të veçantë për të gjithë qytetarët e vendit, dhe është në proces intensiv të lobimit për ta përmbyllur anëtarësimin e plotë në një kohë sa më të shpejtë, duke respektuar të gjitha standardet e parapara të Këshillit të Evropës.

Po kërkoni diçka tjetër?

Kontakti i përgjithshëm