4460 - Single_lajmi | Ministria e Puneve te Jashtme
MPJ
  • SHARE
  • PRINT

Zëvendësministri Ahmeti në SHBA, zhvillon takime me zyrtarë të lartë amerikanë

9 shtator 2021 

Në kuadër të vizitës zyrtare në Shtetet e Bashkuara të Amerikës, zëvendësministri i Punëve të Jashtme dhe Diasporës, z. Kreshnik Ahmeti, takoi drejtoreshën për Ballkan dhe Evropë Qendrore, në kuadër të Këshillit Kombëtar të Sigurisë, znj. Robin Brooks, dhe drejtorin e zyrës për Evropën jugore dhe qendrore, në kuadër të Departamentit të Shtetit, z. Martin Mcdowell.

Në këto takime u diskutua lidhur me raportet bilaterale mes Republikës së Kosovës dhe Shteteve të Bashkuara të Amerikës, mbi bashkëpunimin rajonal në Evropën Juglindore si dhe mbi proceset e tjera me interes për vendin dhe rajonin.

 Z. Ahmeti falënderoi zyrtarët e Shteteve të Bashkuara për ndihmën dhe bashkëpunimin e përhershëm, duke vënë theksin në donacionet e fundit që ka pranuar Republika e Kosovës në shërbim të luftimit të pandemisë COVID-19 dhe në shërbim të ngritjes së kapaciteteve të Forcës së Sigurisë së Kosovës.

Në kuadër të zhvillimit të mëtutjeshëm të marrëdhënieve bilaterale rëndësi gjithnjë e më e madhe do t’i kushtohet bashkëpunimit ekonomik. Në këtë drejtim prioritet i Qeverisë së Republikës të Kosovës mbetet krijimi i kushteve sa më të mira për bizneset  dhe rritjen e eksportit të mallrave nga prodhuesit vendor.  

Përgjatë diskutimit zyrtarët e Departamentit të Shtetit dhe të Këshillit Kombëtar të Sigurisë, shprehën mirënjohje dhe falënderim për reagimin e shpejtë dhe qasjen proaktive të institucioneve të Republikës së Kosovës për strehimin dhe lehtësimin e procesit të evakuimit të shtetasve afgan.

Në këto takime u vlerësuan lartë raportet mes të dyja vendeve dhe palët u zotuan që të angazhohen për fuqizimin e mëtutjeshëm të tyre.

Foto Galeria