Java e Kulturës së Kosovës jashtë vendit është iniciativë bashkëpunimi ndërmjet Ministrisë së Punëve të Jashtme dhe Diasporës (MPJD) dhe Ministrisë së Kulturës, Rinisë dhe Sportit (MKRS), me qëllim të shpërfaqjes së talentit dhe potencialit artistik të Kosovës në skenën ndërkombëtare. Duke promovuar identitetin kulturor të Kosovës jashtë vendit, synon t'i forcojë lidhjet ndërmjet artistëve nga Kosova, diaspora dhe atyre në vendet pritëse.

Java e parë e kulturës së Kosovës jashtë vendit do të mbahet në Portugali, nga 19 marsi deri më 24 mars 2023. Gjatë pesë ditëve, përmes ngjarjeve kulturore, publiku portugez do të ketë rastin të njihet me artin e larmishëm dhe me identitetin e pasur kulturor të Kosovës. Ngjarjet, të cilat janë planifikuar të zhvillohen në Lisbonë, Bragë dhe Porto, do të përfshijnë një gamë të gjerë të formave të artit, duke filluar nga muzikë, filmi, artet pamore, librat e deri tek gastronomia. Objektivi ynë është t'i ofrojmë publikut portugez një përvojë të veçantë: të shijojë pasurinë dhe larminë e skenës kulturore dhe artistike të Kosovës.

Ne i ftojmë përzemërsisht të gjithë të na bashkohen në festimin e trashëgimisë së pasur kulturore të Kosovës gjatë Javës së Kulturës së Kosovës jashtë vendit. Kjo ngjarje kulturore zotohet të jetë një përvojë e veçantë dhe e paharrueshme që nxjerr në pah talentin artistik dhe identitetin kulturor të Kosovës. Arti ka fuqinë t'i bashkojë njerëzit, të nxitë mirëkuptimin dhe bashkëndjesinë, si dhe të promovojë paqen dhe bashkëpunimin ndërmjet vendeve. Besojmë se kjo ngjarje do të rezultojë me forcimin e lidhjeve kulturore ndërmjet dy vendeve, për të hapur rrugën për bashkëpunim të mëtejshëm.