Nën drejtimin e Zëvendësministrit të Punëve të Jashtme dhe Diasporës, z.Kreshnik Ahmeti, dhe Drejtoreshës së Përgjithshme të Ministrisë së Punëve të Jashtme të Estonisë, znj.Siiri Königsberg, u zhvilluan konsultimet politike midis dy vendeve.
Gjatë takimit u vlerësuan lartë marrëdhëniet e konsoliduara mes Republikës së Kosovës dhe Republikës së Estonisë. Po ashtu, u trajtuan në detaje temat e bashkëpunimin bilateral si dhe u diskutua mbi zhvillimet aktuale në të dyja vendet si dhe bashkëpunimin në rrafshin ndërkombëtar.
Në kuadër të bashkëpunimit bilateral u bisedua për avancimin e bashkëpunimit në fusha të ndryshme, me fokus të veçantë mbi mundësitë e përfitimit nga Estonia në fushat e digjitalizimit të arsimit dhe sportit, mbrojtjes, energjisë dhe teknologjisë.
Sa i përket bashkëpunimit multilateral u trajtuan proceset integruese të Kosovës në organizata ndërkombëtare, me theks të veçantë Këshillin e Evropës dhe Bashkim Evropian. Me këtë rast, Zëvendësministri Ahmeti, e falënderoi Republikën e Estonisë për përkrahjen e vazhdueshme për Kosovën në këto procese.
Lidhur me zhvillimet aktuale në të dyja vendet, fokus i bisedës ishte agresioni i Serbisë nëpërmjet sulmit terrorist ndaj Republikës së Kosovës në shtator të vitit të kaluar dhe ndikimi rus në rajon përmes Serbisë. Në këtë kontekst u fol edhe për agresionin e paprovokuar rus ndaj Ukrainës dhe ndikimin e saj në rajonet përkatëse.
